Самарқандда ўғрилик қилиб юрган гуруҳ фаолиятига чек қўйилди

Самарқанд вилоятида ўғрилик билан шуғулланувчи гуруҳ фаолиятига ИИБ томонидан чек қўйилди. Бу ҳақда вилоят ИИБ ахборот хизмати хабар берди.

Фото: iiv.uz

Хабарга кўра, 10 февраль куни Каттақўрғон шаҳар ИИБга фуқаро ариза билан мурожаат қилиб, қўл телефони ва эҳтиёт қисмлари сотиладиган дўконига номаълум шахс ғайриқонуний равишда кириб, жами 8 миллион сўмлик телефон аппаратларини яширин равишда талон-торож қилиб воқеа жойидан яширинганлигини маълум қилган.

Таъкидланишича, тезкор-қидирув тадбирлари натижасида мазкур жиноят муқаддам ЖКнинг 169-моддаси (Ўғрилик) 2-қисми билан судланган, ИИО қидирувида бўлган 1997 йилда туғилган Д.Ш., 2003 йилда туғилган А.Ш., 2006 йилда туғилган М.Р., 2004 йилда туғилган фуқаро Қ.Б. томонидан содир этилганлиги аниқланиб, улардан 3 дона «Inoyi» русумли ҳамда 1 дона «J-2» русумли қўл телефонлари далилий ашё сифатида ҳужжатлаштириб олинган.

Шунингдек, ушбу шахслар 8 февраль куни савдо дўконига ғайриқонуний равишда кирмоқчи бўлган вақтларида, жабрланувчи келганлигини кўриб қолган ва ўзларига боғлик бўлмаган ҳолда жиноятни охирига етказа олмаганликлари аниқланди.

Ҳолат юзасидан Жиноят кодексининг 169-моддаси (Ўғрилик) 2-қисми «г» банди жиноят иши қўзғатилиб, тергов ҳаракатлари олиб борилмоқда.