Шавкат Мирзиёев Ўзбекистон терма жамоасини ЖЧ-2026 даги иштирокидан кейин қўллаб-қувватлашга чақирди

Президент футболчилар муҳим тажриба орттирганини, айбдорларни қидириш ва ортиқча ҳис-туйғулар билан эътироз билдириш эса Ўзбекистон халқининг табиатига ёт эканлигини таъкидлади

Ўзбекистон Президенти Шавкат Мирзиёев футбол бўйича терма жамоани Жаҳон чемпионатидаги иштирокидан кейин айбдорларни қидирмасдан, қўллаб-қувватлашга чақирди. Бу ҳақда давлат раҳбари ёшлар билан учрашувда маълум қилди.

Жумладан, давлат раҳбари жамоа кучли рақиблар билан бўлган ўйинларда муҳим тажриба орттирганини таъкидлади.

Президент, миллий жамоанинг АҚШ ва Мексика майдонларидаги ўйинларини бутун халқ билан бир тан-у, бир жон бўлиб, катта ҳис-ҳаяжон билан кузатиб боргани билдирди.

Футболчилар ФИФА рейтингида 5-ўринда турган Португалия, 13-ўриндаги Колумбия ҳамда кўплаб футболчилари Европанинг етакчи клубларида тўп сурадиган Конго терма жамоалари билан ўтказилган ўйинлар орқали ўзига тажриба орттиргани таъкидланди.

Шу биалн бирга, Аббос Файзуллаев ва Элдор Шомуродов жаҳон чемпионатидаги илк голларини киритиб, халқга хурсандчилик бағишлагани билдирилди.

Шунингдек, миллий терма жамоанинг Жаҳон чемпионатидаги иштироки тўғрисида турли фикрлар билдирилаётгани айтиб ўтилди.

Лекин Ватанимиз шарафини ҳимоя қилган терма жамоамиз аъзоларига ортиқча ҳис-туйғу билан эътироз билдириш, улардан айб қидириш халқимизга хос иш эмас. Аксинча, бугун уларни қўллаб-қувватлаш, руҳини кўтариш ҳар қачонгидан ҳам муҳим, – деди Президент.

Катта ғалабалар ҳали олдинда экани, бунинг учун футболни ривожлантиришга янада кенг шароитлар яратилиши, бу соҳага инвестиция кўпайтирилиши таъкидланди. Келаси йилнинг январида Саудия Арабистони майдонларида ўтказиладиган футбол бўйича Осиё кубогига тайёргарлик ҳозирдан бошланиши таъкидланди.

Биз жамоамизга ишонамиз ва ушбу мусобақада ҳам бутун халқимиз билан қўллаб-қувватлаймиз, – деди Президент.