Трамп Путин билан Украинада тинчлик ўрнатиш ҳақда гаплашади

АҚШ президенти Доналд Трамп душанба куни Россия президенти Владимир Путин билан Украинадаги урушига барҳам бериш масаласида телефон орқали мулоқот қилади. Бу ҳақда Reuters хабар берди. 

Бу орада Европа давлатлари Кремлни шартсиз ўт очишни тўхтатишга чақирмоқда.

Трамп бу суҳбат давомида ҳар ҳафтада ўртача 5 минг нафарга яқин ҳарбий ҳалок бўлаётган «қирғин»ни тўхтатиш ва савдо масалаларини муҳокама қилишини билдирган. У, шунингдек, Украина президенти Владимир Зеленский ва NATO етакчилари билан ҳам алоҳида суҳбатлар ўтказишни режалаштирган.

Кремль Трамп билан телефон мулоқоти бўйича тайёргарлик кетаётганини тасдиқлаган. Трампнинг маъмурияти агар Россия тинчлик музокараларига жиддий ёндашмаса, унга нисбатан янги санкциялар жорий этилишини истисно қилмаган.

Хабарга кўра, Россия якшанба куни уруш бошланганидан бери Украинага энг йирик дрон ҳужумини уюштирган. Украина разведкаси Москванинг қитъалараро баллистик ракета учириш эҳтимоли борлигини билдирган, бироқ бу маълумот Россия томонидан тасдиқланмаган.

Қайд қилинишича, Путин ўз позициясида қолмоқда — у урушни тўхтатиш учун Украина NATOга қўшилишдан расман воз кечиши ва Россия томонидан аннексия қилинган тўрт вилоятдан қўшинларини олиб чиқиб кетишини талаб қилмоқда.

Трамп телефон мулоқоти душанба куни АҚШ вақти билан соат 10:00 да бўлиб ўтишини маълум қилган.