Ўзбекистонда кичик бизнесни текширишга 3 йиллик мораторий жорий этилади

Ўрта ва йирик бизнес учун ихтиёрий профилактик аудит жорий этилади

Эслатиб ўтамиз, бугун президент Шавкат Мирзиёев Хоразм вилоятида тадбиркорлар билан очиқ мулоқот ўтказмоқда.

Давлат раҳбари бешинчи йўналиш сифатида бизнесга маъмурий босимни камайтиришни белгилаб берди.

Қайд этилишича, сўнгги 3 йилда солиқ юки 13,4%дан 12%га, ўн йилда яширин иқтисодиёт улуши 50%дан 26%га тушди.

Иқтисодиётни «соя»дан чиқариш текшириш билан эмас, тадбиркорга йўл кўрсатиб, тўғри ишлашга ўргатиш орқали бўлиши керак, — деди давлат раҳбари.

Маълум қилинишича, таҳлил қилинган 5 минг тадбиркорнинг ярмидан кўпида бир йилда 2-3 марта, яна 21%да 4 мартадан солиқ текшируви ўтказилган. Бунга ёнғин, қурилиш, санитария, карантин ва энергия инспекцияларининг такрорий текширувлари ҳам қўшилмоқда.

Бир нарсани тушуниш керак: хотиржамлик бўлмаган жойда эркинлик ҳам, ривожланиш ва янгиликка интилиш ҳам бўлмайди, – деди президент.

Шу боис, кичик бизнесда инсон соғлиғи ва бошқа тадбиркорлар манфаатига зарар етказиш билан боғлиқ бўлмаган ҳар қандай текшириш учун 3 йил муддатга мораторий эълон қилинди.

Шунингдек, ўрта ва йирик тадбиркор ўз корхонасини ихтиёрий профилактик аудитдан ўтказса, унинг хулосасини солиқ органи тан олади. Камчиликни бартараф қилган тадбиркор жаримага тортилмайди, бир йилда такрорий текширув эса фақат Бизнес-омбудсман рухсати билан ўтказилади.