Самарқандда таркибида олтин бўлган тошларни ноқонуний қазиб олган гуруҳ аниқланди
Самарқанд вилояти Пахтачи туманида таркибида олтин бўлган руда тошларни ноқонуний қазиб олиш билан шуғулланиб келган гуруҳ аниқланди.
Маълум бўлишича, ДХХ Самарқанд вилояти бошқармаси ҳамда Пахтачи тумани ИИБ ходимлари билан ҳамкорликда тезкор тадбир ўтказилган. Унда таркибида олтин моддаси бўлган руда тошларни ноқонуний қазиб олиш билан шуғулланувчи жиноий гуруҳ фаолиятига чек қўйилган.
Хусусан, Пахтачи туманида яшовчи фуқаролар 1974 йилда туғилган М.Х., 1985 йилда туғилган Х.У.лар яшаш хонадонида таркибида олтин моддаси бўлган тахминан 920 килограмм руда тошлар ҳамда бошқа ашёвий далиллар мавжудлиги аниқланиб, хужжатлар расмийлаштирилди.
Ушбу рудаларни қайта ишлаш сабаб 339 миллион сўмдан ортиқ табиий газ ва электр энергияси талон-торож қилингани аниқланди. Ҳозирда гуруҳ аъзоларига нисбатан Жиноят кодексининг тегишли моддалари билан жиноят иши қўзғатиш режалаштирилиб, суриштирув ҳаракатлари олиб борилмоқда.
