Россияда Ўзбекистон фуқароси вояга етмаган қизни ўпгани учун 7 йилга қамалди
Россиянинг Калуга вилоятида, вояга етмаган шахснинг жинсий дахлсизлигини бузиш билан айбланган Ўзбекистон фуқаросига ҳукм чиқарилди. Бу ҳақда «Московский комсомолец» хабар берди.
Воқеа 2024 йил февраль ойида Обнинскда содир бўлган. Аниқлик киритилишича, қиз муз конькисида учиш тогарагидан уйига қайтаётган бўлган. Шу пайт вокзал ёнидан ўтаётган бир эркак унинг олдига келиб, бўйнидан ушлаган ва ўпган.
Шундан сўнг, жабрланувчи воқеа ҳақида ота-онасига айтиб берган. Натижада қизнинг ота-онаси ҳуқуқ-тартибот идораларига мурожаат қилишган.
Мурожаатдан кейин, ушбу ишни содир этган Ўзбекистон фуқароси қўлга олинган.
Фуқаро Россия Жиноят кодексининг 132-моддаси 4-қисми «б» банди (14 ёшга тўлмаган шахсга нисбатан жинсий характердаги зўравонликни содир этиш) бўйича айбдор деб топилди.
Фуқарога етти йил озодликдан маҳрум қилиш жазоси тайинланди, у жазони қаттиқ тартибли колонияда ўтайди.