Уйланишни ваъда қилиб, тўрт аёлни 165 миллион сўмга туширган йигитга суд ҳукми ўқилди
26 яшар йигит ўзини Тошкент молия институти битирувчиси, айни пайтда шахсий бизнесини бошлаган тадбиркор сифатида таништирган.
Sovchilar.uz ва Oila номли Telegram-каналларни юритиб келган 26 яшар йигит турмушга чиқиш ниятида бўлган қизларни алдаб келган. Жумладан, 4 нафар қизга уйланмоқчи эканини айтиб, уларни бунга ишонтирган.
Ўзини Тошкент молия институти битирувчиси, айни пайтда шахсий бизнесини бошлаган тадбиркор сифатида таништирган йигит қизларнинг ишончига кириш орқали уларнинг номига банклардан жами 165 млн сўм миқдорида кредит олишга эришади.
Жиноят жабрланувчилардан бирининг ҳуқуқни муҳофаза қилувчи идораларга йўллаган аризасидан сўнг фош бўлади.
«Тelegramʼдаги Oila, Sovchilar.uz каналларига ўхшаш кўп каналлар бор. Шу ерда келинликка ва куёвликка номзодларнинг маълумотлари эълон қилинади. Судланувчи ўзи ҳақида эълон берган, ўзини куёвликка номзод сифатида тақдим этган. Телефонда гаплашиб, кўришиб олайлик деб айтди. Мен ҳам фарзандимга ота бўла оладиган турмуш ўртоқ қидираётгандим. У уйланиш нияти жиддий экани, маҳрга машина, уй беришини айтди. Бунинг учун ишлайдиган аёл бўлиши керак, деди.
Эртаси куни банкка бориб, сенинг номингга кредит оламиз, пулни айлантириб уч куннинг ичида қайтариб бераман, деб ишонтирди. Номимга 18 млн сўм миқдорида кредит расмийлаштирилган. Муддат ўтиб кетди, пулни эртага қайтараман, индинга қайтараман деб юриб бирдан йўқолиб қолди. Шундан сўнг «102»га қўнғироқ қилиб, ҳолат юзасидан ариза беришга мажбур бўлдим. Тергов давомида у мендан бошқа яна уч нафар қизни алдагани маълум бўлди», дейди жабрланувчилардан бири.
Судда фирибгар ҳали оила қурмагани, Telegram-каналларни пул ишлаш учун очганини таъкидлаган.
«Теlegram-каналларимда эълон қилинадиган ҳар битта анкета учун алоҳида тўлов белгиланганди. Уйланаман деб ҳеч кимга ваъда бермаганман. Бошидан айтилган, юз доллар эвазига уларнинг номига кредит олганман. Ҳар биттасига паспортим, “права”ларим кўрсатилган. Пул олди-бердиларини тўлиқ тан оламан. Жабрланувчилардан бирини урганимни ва сўкканларимни ҳам тан оламан», дея журналистларга интервью берган судланувчи.
Жиноят ишлари бўйича Бектемир тумани суди томонидан 26 яшар йигит 6 йилга озодликдан маҳрум қилинди. Бундан ташқари, суд ҳукмида судланувчи жабрланувчиларга етказган зарарни тўлиқ қоплаб бериши ҳам кўзда тутилган.
