«Ўзбекистон темир йўллари» ва Skoda Transportation 10 та электропоезд етказиб бериш бўйича келишувга эришди
Томонлар Ўзбекистон Республикаси эҳтиёжлари учун 10 та замонавий электропоезд етказиб бериш бўйича шартнома туздилар
Бугун, 2026 йил 17 июнь куни Тошкент халқаро инвестиция форуми доирасида шаҳар атрофи ташувлари оператори «Шаҳар атрофида йўловчи ташиш» МЧЖ («Ўзбекистон темир йўллари» АЖ) ва Чехиянинг Skoda Transportation компанияси ўртасида шартнома имзоланди.
Лойиҳа мамлакат темир йўл инфратузилмасини модернизация қилишга қаратилган.
Унинг амалга оширилиши илғор Европа технологияларидан фойдаланган ҳолда ҳаракатланувчи таркиб паркини янгилаш, йўловчи ташиш сифати ва қулайлигини халқаро хавфсизлик ҳамда энергия самарадорлиги стандартлари даражасига кўтариш имконини беради.
Янги ҳаракатланувчи таркиб замонавий бошқарув ва ҳавони кондициялаш тизимлари билан жиҳозланади. Ушбу ечимлар Ўзбекистон аҳолиси ва меҳмонлари учун саёҳат пайтида юқори даражадаги қулайликни таъминлайди.
Ташаббуснинг муҳим қисми — Ўзбекистонда техник хизмат кўрсатиш бўйича қўшма корхона ташкил этишдан иборат бўлади.
Бу мамлакат ичида поездларнинг тезкор хизмат кўрсатилишини таъминлаш, янги иш ўринлари яратиш ва маҳаллий темир йўл тармоғини янада ривожлантиришга хизмат қилади.
Битимнинг имзоланиши Ўзбекистон ва Чехия Республикаси ўртасида транспорт соҳасидаги ҳамкорлик мустаҳкамланиб бораётганини ҳам тасдиқлайди.
Сайт: railway.uz.
Instagram: @uzrailways_uz.
Telegram: uzrailways_uz.
You Tube: @uzrailwaysuz.
