«Саида Мирзиёева билан ушбу лойиҳани оталиғимизга олдик». Комил Алламжонов «Заковат» ўйини ҳақида

Масс-медиани қўллаб-қувватлаш ва уни ривожлантириш жамоат фонди раҳбари Комил Алламжонов фоалияти якунланган «Заковат» интеллектуал ўйинини эфирга қайтаришини маълум қилди. У бу ҳақда ўзининг Telegram каналида ёзиб қолдирган.

Фото: Масс-медиани қўллаб-қувватлаш жамоат фонди

«‘Заковат’ ёпилмайди. Аксинча, гуллайди. Биз @SShMirziyoyeva билан ушбу лойиҳани ўз оталиғимизга олдик. Бу йил, иншааллоҳ, ушбу медиа лойиҳа орқали республикамиздаги янгидан янги билимдон ёшларни кашф қиламиз», — деб таъкидлаган Алламжонов.

У каналда #сенёлғизэмассанзаковат, #билимдонгакенгйўл каби ҳештеглар билан лойиҳани қўллаб-қувватлаётганини маълум қилган.

Аввалроқ ушбу кўрсатувнинг ёпилиши айтилганди. Шундан сўнг бу хабар ижтимоий тармоқ фойдаланувчилари орасида муҳокамаларга сабаб бўлган. Хусусан, блогер Хушнудбек Худойбердиев буни маълум қилиб: «Аммо барибир жамиятда илмга бўлаётган муносабат мени хавотирга солади. Бугун аксарият инсонларни фақат қорин ғами ва ўйин-кулгу ўйлантиряпти холос. Бошқа нарса унча қизиқмас.

Телеканалларнинг эса фақат пул учун рейтинг кетидан қувиши, ўлдим-куйдим, савиясиз сериаллару, бачкана шоуларга ўч бўлиши ҳам жамиятдаги умумий ҳолатнинг акс-садосидир», дея пост қолдирган.