Ўзбекистон фуқаролари Open Budget лойиҳасидаги овозлар учун мукофот ваъда қилаётган фирибгарлардан огоҳлантирилди
Ўзбекистон Республикаси Иқтисодиёт ва молия вазирлиги берилган овозлар учун тўлов олинмаслигини ва моддий рағбатлантиришлар кўзда тутилмаганини эслатиб ўтди
Ўзбекистон Республикаси Иқтисодиёт ва молия вазирлиги фуқароларни «Ташаббусли бюджет» лойиҳасида овоз бериш жараёнлари билан боғлиқ фирибгарлик ҳолатларидан огоҳлантирди.
Маълумотларга кўра, ватандошларга расмий бўлмаган Telegram-ботлар орқали овоз беришда иштирок этганликлари учун пул мукофотлари таклиф қилинмоқда. Аммо амалиётда фуқароларга пул маблағлари тўлаб берилмаяпти ва вазирликка шу каби ҳолатлар бўйича юзлаб мурожаат ва шикоятлар келиб тушган.
Ушбу ҳолатда учинчи шахслар лойиҳаларга овоз тўплаш мақсадида пул маблағлари ёки моддий қийматиликлар ваъда қилган ҳолда фуқаролардан овоз тўплаб, кейинчалик мукофотларни бермаслиги ҳолатлари кузатилмоқда, — дейилади хабарда.
Вазирликда таъкидланишича, расмий овоз бериш жараёни фақат Open Budget портали, Android ва iOS учун мўлжалланган мобил иловалар ҳамда расмий Telegram-бот орқали амалга оширилади.
Бунда, амалдаги тартибга кўра, берилган овозлар учун ҳеч қандай тўлов талаб этилмаслиги билан бир қаторда ҳеч қандай моддий рағбатлантиришлар ҳам назарда тутилмаган.
Эслатиб ўтамиз, овоз бериш жараёни 31-август куни соат 23:59 га қадар давом этади.
