Тошкентда ҳужрада болаларни калтаклаб, диний таълим бериб келганлар аниқланди — видео

Тошкент шаҳрида яширин диний таълим бериб келган шахслар қўлга олинди. Бу ҳақда «Zamon» информацион дастурида хабар берилди.

Кадр: YouTube/Yangi Davr

Таъкидланишича, ҳуқуқ-тартибот идораларининг Тошкент шаҳрида ўтказилган тезкор тадбирида 3 нафар маҳаллий фуқаро ўз хонадонларида ҳужралар ташкил этиб, ёш болаларга ноқонуний диний сабоқ бераётганлиги аниқланган.

Ҳужрада 32 нафар болага диний-экстремистик дарслар ўтилган. Фуқаролар уйида 3 та хонада ҳура ташкил қилган. Уларнинг бирида 17 нафар, иккинчисида 11 нафар, учинчисида эса 4 нафар вояга етмаган бола диний сабоқ олаётгани аниқланган.

Ноқонуний ўқитиш вақтида болалар калтакланиб, доимий равишда оч қолдириш орқали жазоланган. Бундан ташқари икки нафар бола чангютгичнинг «шнур»и билан 15–17 марта калтаклаган. Калтакланиш оқибатида бир боланинг тили орқага кетиб қолиш ҳолати кузатилган.

Хабарда айтилишича, ҳужралар ташкил этилган хонадонлар кўздан кечирилганида, ёғоч калтак, пичоқ, пневмотик қурол топилган. Шунингдек, ҳужралар эгаларининг қўл телефонларида диний экстремистик оқимлар ва террорчи ташкилотларнинг ғоявий раҳбарларининг жиҳодга чорловчи аудио, видеоматериаллари борлиги аниқланган. Ҳозирда мазкур ҳужраларни ташкил қилганларга нисбатан қонуний чора кўрилмоқда.

Аввалроқ Фарғонада тақиқланган диний маърузаларни тарқатиб келган 18 ёшли йигит суд қилингани ва Ўзбекистон фуқароларини Суриядаги террорчилик ташкилотига жўнатиб келган шахс қўлга олингани ҳақида хабар қилинганди.