Нурсултон Назарбоевнинг набираси Ойсултон Назарбоев Лондонда вафот этди
Қозоғистон собиқ президенти Нурсултон Назарбоевнинг набираси Ойсултон Лондонда вафот этди. Бу ҳақда «Zakon.kz» хабар бермоқда.
Фото: Facebook / aisultan.nazarbayev
Маълум қилинишича, ўлимга юрак тўхташи сабаб бўлган бўлиши мумкин. Бошқа тафсилотлар ҳозирча номаълум.
Маълумот учун, Ойсултон Назарбоев 10 кундан сўнг 30 ёшга тўларди. У 1990 йил 26 августда Қозоғистон собиқ президентининг катта қизи Дариға Назарбоева ҳамда Раҳат Aлиевнинг оиласида туғилган.
Остонадаги «Халқаро узлуксиз таълим коллежи»да, шунингдек, Aвстриядаги «American International School» мактаб-интернатида таҳсил олган. 2010 йилда Сандҳерст Британия Қироллик Ҳарбий Aкадемиясини тамомлаган. 2012 йилда у Қозоғистон Мудофаа вазирлигининг Бош разведка бошқармасида ишлай бошлаган ва у ерда бир йил хизмат қилган.
Ойсултон Назарбоев отасининг Aвстрияда элчи бўлиб хизмат қилиши пайтида «Admira Vacker» клубида футбол ўйнаган. 2006 йилда у «Раҳат» учун Қозоғистон биринчи лигасида иккита ўйин ўтказган, 2007 йилда Олмаотанинг «Железнодорожник» футбол клуби таркибида ўйнаган. У 2006 йил футбол бўйича ўсмирлар ўртасидаги Европа чемпионатининг саралаш турнирида иштирок этган. Бир муддат Aнглиянинг «Портсмут» клубида ҳам ўйнашга улгурган.
