Ўзбекистонда 25 декабрдан карантин чекловлари қайтиши ҳақидаги хабарларга ойдинлик киритилди
Ижтимоий тармоқларда 25 декабрдан карантин чекловлари қайтиши, мактаб, боғча ва савдо-сотиқ ярмаркаларининг ишлаши чекланиши ҳақидаги хабарлар тарқалди. Бу хабарга манба қилиб «Kun.uz» нашрига ҳавола берилган.
Фото: «Tez News»
Ҳуқуқшунос-блогер Хушнуд Худойбердиевнинг аниқлик киритишича, бу хабарлар тасдиғини топмаган. Нашрга ҳавола кўрсатилган хабар умуман бошқа мазмундалиги қайд этилган.
Жумладан, хабарларда тарқатилган бу ҳаволага кирилганда «‘Янгиариқдан келдим, у йўл йўл эмас’ — Мирзиёев Хоразм йўлларини яхшилаш бўйича топшириқ берди» сарлавҳали хабар очилади.
«Қайсидир чаласавод ёлғон маълумот тарқатса, дарров ишониб кетавермасдан, озгина текширишни ҳам ўрганайлик, илтимос. Бугунги ахборот асрида бунақа ёлғон хабарлар кўп тарқалади, шунинг учун ўзимизда ҳам озгина иммунитет ҳосил қилишимиз, ёлғонни ростдан ажрата олиш кўникмамизни шакллантириб боришимиз керак.
Лекин фейк хабардаги битта гап тўғри: илтимос, ниқобсиз юрманг, ниқоб тақишни ҳали ҳеч ким бекор қилгани йўқ!», — деб ёзади Хушнуд Худойбердиев.
Мавзуга доир:
- Касалланиш камаймоқда: Ўзбекистон коронавирусни енгдими ёки бошқалар билмаган даволаш усулини топдими? Нурмат Отабеков жавоб берди
- Мутахассис фуқаролар гигиена қоидаларига амал қилса, Ўзбекистонда карантин чекловлари кучайтирилмаслигини айтди
- Ўзбекистонда коронавирусга қарши эмлаш учун қанча кўнгилли танлаб олингани маълум бўлди
Аввалроқ Буюк Британияда коронавируснинг янги тури — COVID-21 аниқлангани ва дунё бўйлаб коронавирусга чалинганлар сони 70 миллиондан ошгани ҳақида хабар қилинганди.
