Чилонзорда кучли таъсир қилувчи дори воситасини сотган дорихона аниқланди

Чилонзор туманида кучли таъсир қилувчи дори воситасини сотган дорихона фаолияти аниқланган. Бу ҳақда Прокуратура департаменти хабар қилди.

Фото: Прокуратура департаменти

Маълум бўлишича, «S.L.» МЧЖга қарашли дорихона раҳбари ва сотувчиси кучли таъсир қилувчи 30 дона «Zardex» дори воситасини 600 минг сўмга сотган вақтида ушланган ва дорихонада муомалага киритиш учун сақлаб келинаётган яна 870 дона «Zardex», 120 дона «Gabagamma» ҳамда 111 дона «Тебантин» номли дори воситалари Бош прокуратура ҳузуридаги Департамент ҳамда ДХХнинг туман бўлимлари томонидан ашёвий далил сифатида олинган.

Мазкур ҳолат юзасидан Жиноят кодексининг 186-3-моддаси (таркибида кучли таъсир қилувчи моддалар мавжуд бўлган дори воситаларини рецепт бўйича чакана реализация қилиш тартибини бузиш) билан жиноят иши қўзғатилиб, тергов ҳаракатлари ўтказилмоқда.