Умрзoқов Тошкентдаги аукционга қўйилган бозорларнинг ҳеч бири ёпилмаслигини маълум қилди
Пойтахт ҳокими сўзларига кўра, инвесторлар бозорларнинг фаолият турини ва тадбиркорларнинг иш ўринларини сақлаб қолишлари шарт
Тошкентдаги бозорларнинг ҳеч бири ёпилмайди, деб пойтахт ҳокими Шавкат Умрзоқов ЎзАга берган интервьюсида маълум қилди.
Эслатиб ўтамиз, аввалроқ Тошкентда 35 та бозор ва савдо мажмуаси аукционга қўйилиши ҳақида хабар берилган эди.
Умрзоқовнинг таъкидлашича, фаолият кўрсатаётган бозорлар кўп ҳолларда ташқи кўриниши бўйича ҳам, бизнес-модели бўйича ҳам замонавий талабларга жавоб бермай қўйган.
35 та давлат бозори ва савдо мажмуаси инвесторларга таклиф этилмоқда. Лекин бир нарсани аниқ айтаман: бирорта бозор ёпилмайди ва ўз функциясини йўқотмайди. Инвесторга учта қатъий шарт қўйилади: белгиланган ҳажмдаги савдо расталарини замонавий шаклда қуриб давлатга топшириш, мавжуд тадбиркорларнинг иш ўринларини сақлаш ва етарли сиғимдаги автотураргоҳ барпо этиш, — деди Умрзоқов.
Унинг сўзларига кўра, инвестор фақат самарасиз фойдаланилаётган майдонларда савдо, хизмат ва кўнгилочар объектлар қуриш ҳуқуқини олади. Бу борада Экобозор бу модель ишлашини кўрсатгани таъкидланди.
Халқаро тажриба ҳам бор – Роттердамдаги Markthal ёки Лиссабондаги Time Out Market тарихий бозор функцияси сақланган ҳолда шаҳарнинг энг гавжум нуқталарига айлангани бунга мисол бўла олади. Бизнинг бозорларимиз ҳам миллий муҳитини сақлаган ҳолда айнан шундай ривожланиши керак, — деди пойтахт ҳокими.
Шу билан бирга, яна бир катта ишлардан бири, бу – 24/7 ишлайдиган туристик ва гавжум кўчалар эканлиги билдирилди.
Қайд этилишича, умумий узунлиги 140 километр бўлган 100 га яқин кўча танлаб, тоифаларга ажратилди, – маҳаллий дам олиш ҳудудларидан то туристик манзилларгача. Синов тариқасида бугунги кунда 8 та туну кун ишлайдиган кўча очилди.
Хусусан, фақатгина таъмирлаш ёки қурилиш билан чекланилмаслиги, ҳар бир кўчага инфратузилмани озода сақлайдиган ва тадбирлар ташкил этадиган бошқарув компанияларини, шу жумладан, энг ривожланган шаҳарларда ишлайдиган самарали ва креатив жамоалар жалб қилиниши таъкидланди.
