«Юксалиш» ҳаракати раиси Бобур Бекмуродов жамоат транспортларида мажбурий қўлқоп тақишни мантиқсизлик деб атади
«Юксалиш» умуммиллий ҳаракати раиси, Олий Мажлис депутати Бобур Бекмуродов Транспорт вазирлигининг жамоат транспортларида мажбурий қўлқоп тақиш бўйича қарорини мантиқсизлик деб атади. Бу ҳақда депутат ўзининг Telegram каналида хабар берди.
Фото: Facebook/Bobur.Bekmurodov.1
Маълум қилинишича, депутат Транспорт вазирлиги томонидан жорий этилган Тошкент шаҳар жамоат транспорти хизматидан фойдаланганда йўловчиларнинг тиббий қўлқопда бўлиш тартиби қарорининг мантиқийлиги ва ҳуқуқийлиги юзасидан иккита асосий шубҳа бор эканлигини айтган.
«Биринчидан, жамоат транспортида қўлқоп тақилиши ҳақида Махсус комиссия қарори ёки бирор юридик ҳужжат йўқ. Транспорт вазирлигининг бундай қарор қабул қилишга ваколати борми? Агар шундай ҳужжат бўлса, уни эълон қилиш керак.
Иккинчидан, Жаҳон соғлиқни сақлаш ташкилоти коронавирус инфекциясидан сақланишда қўлқоп тақиб юришни самарасиз, деб топган. Жумладан ЖССТ сайтида COVID-19 бўйича савол-жавоблар билан бирга, маълум бир тавсиялар ҳам бериб борилади»,—деди депутат.
Шунингдек, Бобур Бекмуродов ЖССТ веб сайтида коронавирус инфекциясйи бўйича берилган мазкур тавсияга тўхталган.
«Айнан қўлқоп тақиш борасида қуйидаги тавсия мавжуд:
Қўлқоп тақиш самарали эмас. Қўлқопларда вирус тўпланади ва инсон агарда қўлқоп тақилган қўл билан юзига тегса, кўз ёки оғиз орқали вирус юқиши мумкин. Қўлларни мунтазам ювиш ёки спирт воситасида артиб туриш самаралироқ»,—деб ёзади Бекмудоров.
Бундан ташқари, «Юксалиш» умуммиллий ҳаракати раиси текинга тарқатилаётган қўлқопларнинг харид қилиш харажатлари солиқ тўловчиларнинг ҳисобидан амалга оширилишини ҳам таъкидлаган. Сўнгра депутат Транспорт вазирлиги мазкур қарорини бекор қилиб, ўрнига бошқа (қўлни дезинфекция қилиш учун диспенсерларни ўрнатиш каби) ҳимоя усулларини таклиф қилиши кераклигини қайд этган.
Маълумот учун, Тошкентда 19 октябрдан жамоат транспорти йўловчиларига тиббий қўлқопда бўлиш талаби қўйилганди. Кейинчалик шаҳар жамоат транспортларида йўловчиларга қўлқоп бепул тарқатилиши маълум қилинганди.
Сўнгра Тошкентда жамоат транспортида бепул тарқатилаётган қўлқоплар кимнинг ҳисобидан сотиб олинаётгани ва нима сабабдан тиббий қўлқопда бўлиш талаби киритилгани айтилгани ҳақида хабар қилинган эди. Шунингдек, бепул тарқатилаётган қўлқоплар учун бир кунда 28 миллион сўм сарфлангани қайд этилган.
