РФ Ташқи ишлар вазирлиги АҚШдан Россия ички ишларига аралашмаслигини талаб қилди
Россия Ташқи ишлар вазирлиги АҚШ давлат департаменти ва АҚШнинг Москвадаги элчихонасидан Россия ички ишларига аралашмасликни талаб қилди. Бу хақда «Раньше всех. Ну почти.» Telegram канали хабар берди.
Telegram каналнинг CNN’га таяниб хабар беришича, ФБК (А.Навальнийнинг Коррупцияга қарши курашиш жамғармаси) АҚШ Президенти Жо Байдендан 35 кишига, жумладан, «Россия Президенти Владимир Путинга яқин саккизта юқори лавозимли россияликлар»га санкция қўллашини сўраган. СNN ушбу маълумотни жамғарма ва унинг ижрочи директори хатининг нусхасига асосланиб берган.
Бироз вақтдан кейин Россия Федерацияси Федерал Мажлиси Федерация Кенгаши раисининг халқаро ишлар бўйича ўринбосари Владимир Жабаров «РИА Новости»га берган интервьюсида ФБКнинг АҚШни санкция қўллашга чорлашидан «ватанга хиёнатнинг хиди келаётгани»ни айтиб ўтган.
Шунингдек, АҚШнинг Россиядаги элчихонаси ФБКнинг Байденга юборган мурожаатидан хабардор эканини таъкидлаган. Бундан ташқари, АҚШнинг Москвадаги элчихонаси Россия расмийларини якшанба кунги намойишлар давомида инсон ҳуқуқлари бўйича халқаро мажбуриятларга риоя қилишга чақирди.
Бунга жавобан эса Россия Ташқи ишлар вазирлиги АҚШ давлат департаменти ва АҚШнинг Москвадаги элчихонасидан Россия ички ишларига аралашмасликни талаб қилди.
Ҳозирда Россияда Алексей Навальнийнинг қўлга олиниши юзасидан намойишлар бўлиб ўтмоқда. Маълумотларга кўра, 31 январь ҳолатига Россиянинг 86 шаҳрида норозилик акцияларининг 4567 аъзоси қўлга олинган.
