Ўзбекистон аҳолисининг 40% га яқини пул жамғармагани маълум қилинди

Ўзбекистон аҳолисининг 39% и 2024 йилда пул жамғармаган. Бу ҳақда Марказий банкнинг Осиё тараққиёт банки кўмагида ўтказилган сўровномаси натижаларида маълум қилинди.

Тадқиқот 2025 йил январь–февраль ойларида 6 та ҳудуд (Қорақалпоғистон, Қашқадарё, Фарғона, Самарқанд, Жиззах вилоятлари ва Тошкент шаҳри)да 1,2 минг респондент иштирокида ўтказилган.

Сўровда иштирок этганлар таркиби қуйидагича бўлган:

• яшаш жойи бўйича: қишлоқ ҳудудлари — 45%, шаҳарлар — 55%;

• ёши бўйича: 45 ёшгача — 58%, 46-60 ёш — 24%;

• жинси бўйича: аёллар — 60% эркаклар — 40%;

• таълим даражаси бўйича: олий маълумотлилар — 15%, умумий ўрта маълумотлилар — 33%, ўрта махсус маълумотлилар — 45%.

Сўров натижаларига кўра, пойтахт Тошкентда пул жамғармаганлар улуши 25% ни ташкил этган бўлса, Қорақалпоғистонда бу кўрсаткич 54% га етган.

Олий маълумотлиларга қараганда фақат 8-9-синф маълумотига эга бўлганлар орасида пул жамғармаслик кўрасаткичи юқори бўлган — 53%. Энг фаол жамғарувчилар эса талабалар бўлган.

Тадқиқотга кўра, нафақахўрларнинг 46% и ҳам ўтган йилда ҳеч қандай пул жамғармаган. Мазкур маълумотлар «Эксперт фикри» тадқиқот маркази томонидан йиғилган ва юзма-юз суҳбатлар шаклида ўтказилган.