Мисрда «Жора Ташкентский» лақабли жиноят олами авторитети қўлга олинди
Қидирувда бўлган шахс жавобгарликка тортиш учун Ўзбекистонга олиб келинди
Мисрнинг Шарм-эш-Шайхда «Жора Ташкентский» ва «Сорока» лақаблари билан танилган жиноят олами авторитети Георгий Сорокин қўлга олинди. Бу ҳақда ИИВ матбуот хизмати хабар бермоқда.
Сорокин 1972 йилда Тошкентда туғилган, у спорт устаси ҳисобланади.
Сорокин ўзининг биринчи жиноятини 1990 йилда 18 ёшида содир этган ва бунинг учун етти йилга озодликдан маҳрум қилинган. 1990 йилдан бери у бир неча бор жиноий жавобгарликка тортилган ҳамда Ўзбекистон, Россия, Қозоғистон ва бошқа хорижий давлатлар ҳудудида содир этган жиноятлари учун жазо ўтаган. Кейинчалик ушбу шахс бир қатор жиноятларни, жумладан, босқинчилик, талончилик, товламачилик, шунингдек, ноқонуний қурол ва гиёҳвандлик воситаларини сақлаш жиноятларини содир этганликда айбдор деб топилган, — дейилади видеороликда.
Сорокиннинг ёнидан Россия Федерацияси фуқаросининг сохта паспорти топилган бўлиб, у ушбу ҳужжатдан бир қатор давлатлар бўйлаб ҳаракатланишда кўп йиллар давомида фойдаланиб келган.
2021 йилда Тошкентда «Жора Ташкентский» ўз шериклари билан тил бириктириб, умумий қиймати 350 минг долларлик иккита хонадонни эгаллаб олган. У товламачилик йўли билан уй эгасини қўрқитиб, калтаклаган, оила аъзоларига нисбатан зўравонлик ишлатган ва шу йўл билан ушбу кўчмас мулк объектларини ўз шериклари номига расмийлаштириб олган.
Мазкур ҳолат юзасидан Жиноят кодексининг 165-моддаси 3-қисми «а» банди (товламачилик) билан жиноят иши қўзғатилиб, уга нисбатан қидирув эълон қилинган эди.
Қидирувда бўлган шахс жавобгарликка тортиш учун Мисрдан Ўзбекистонга олиб келинди.
