Рақобат қўмитаси «Uzum Market»нинг шикоятидан сўнг «Yandex Market»га қарши чора кўрди
Рақобатни ривожлантириш қўмитаси «YandexGo UB» томонидан жойланган рекламада «Uzum Market»га нисбатан устунлик белгилари кўрсатилган деб топиб, ушбу реклама олиб ташланишини белгилади.
Таъкидланишича, «Uzum Market»дан келиб тушган мурожаат асосида, «YandexGo UB» томонидан телевидение ва ижтимоий тармоқлар орқали намойиш этилган «Yandex Market» рекламаси орқали «Uzum Market»нинг ишчанлик обрўсига путур етказаётганлиги аломатлари бўйича Рақобат қўмитаси Махсус комиссияси томонидан иш қўзғатилган.
Махсус комиссия томонидан ишни кўриб чиқилганда: «YandexGo UB» рекламасидаги актрисанинг бинафша рангли кўйлаги ва роликнинг дастлабки кадрлари «Uzum Market» нинг аввалги видеоларидаги образларга визуал ва концептуал жиҳатдан ўхшашлиги аниқланган.
Шунингдек реклама ролигидаги бош қаҳрамоннинг узум дастасини кўтариб «а, бу маркетми?!» деб берилган саволидан сўнг, ён-атрофдаги реклама иштирокчиларининг бош қаҳрамоннинг саволига нисбатан салбий ҳолатдаги муносабати кўрсатган.
Натижада «а, бу маркетми?!» деган саволи орқали томошабинда «Uzum Market» ҳақида сўз бораётганлиги ҳақида таассурот уйғотилганлиги. Шундан сўнг, актрисанинг «йўқ, бу бошқа маркет» деган жавоби орқали «Yandex Market» устунлиги ҳақида ишора қилинганлиги аниқланган.
Юқоридаги ҳолатлар орқали «YandexGo UB» «Рақобат тўғрисида»ги Қонунининг 21-моддасида назарда тутилган нотўғри таққослаш, яъни рақобатчи хўжалик юритувчи субъектни ёки унинг товарини товарнинг устунлиги ҳақида тасаввур ҳосил қилувчи сўзлардан ёки рамзлардан товарнинг холисона тасдиққа эга бўлган тавсифини ёки таққослаш параметрларини кўрсатмаган ҳолда фойдаланиб таққослашни амалга оширган деб топилган.
Қонунбузилиш ҳолатига мувофиқ, «Yandex Market»га оид мазкур реклама ролигини оммавий ахборот воситаларидан олиб ташлаш орқали қонунбузилиш ҳолатини бир ой муддатда бартараф этиш тайинланди, — дейилади хабарда.
Шу билан бирга, махсус комиссия ҳолатни иқтисодий жиҳатдан паст таъсирли деб баҳолаб, молиявий санкцияларни суд тартибида қўллашни лозим деб топмаган.
Вазиятга Uzum Market хам ўз изоҳини бериб, ҳозирда мамлакатда «электрон тижорат бозори фаол ривожланаётгани ва компания янги ўйинчиларни мамнуният билан кутиб олишини, фақат айнан соғлом рақобат орқали ушбу соҳани олдинга силжий олишини» маълум қилган.
Uzum Market фойдаланувчиларни чалғитмайдиган ҳалол тарғибот усулларига риоя қилишни принципиал жиҳатдан муҳим деб ҳисоблайди. Биз учун вазиятни ҳуқуқий майдонда ҳал қилиш муҳим эди ва умид қиламизки, бу ягона ҳолат истисно бўлиб қолади, — деб таъкидлаган компания.
Уларнинг сўзларига кўра, «бозордаги барча компанияларнинг умумий мақсади онлайн харид маданиятини ривожлантириш, инфратузилмани мустаҳкамлаш ҳамда Ўзбекистондаги одамлар турмушини енгиллаштириш ва қулайроқ қилишдан иборат бўлиши керак».
