Тошкент вилоятида эркак тез ёрдам шифокорини дўппослади
1 июнь куни Тошкент вилоятида яшовчи 1998 йилда туғилган фуқаро тахминан соат 16:35 да тез тиббий ёрдам хизматига бош оғриғи шикояти билан қўнғироқ қилган. Бу ҳақда Тошкент вилояти ҳокимлиги матбуот хизмати хабар берди.
Маълум қилинишича, 4 дақиқадан сўнг чақирув «Янгиобод» пунктидаги энг яқин тез ёрдам бригадасига этқазилган. Мазкур бригада шифокори ва фельдшери манзилга соат 16:45 да етиб келган. Бемор шифокорга бош оғриғи, шунингдек, мунтазам буйрак касалликларини даволаб келишини маълум қилган.
Шифокор беморни касалликлар ҳақида аниқроқ сўроқ қила бошлаганда, эркак уни ҳақорат қилиб, ўз ишини тезроқ бажаришини талаб қилган. Шундан сўнг шифокорнинг юзига мушт туширган. Натижада жабрланувчининг лаби ҳамда пастки жағ соҳасидан қон кетиши бошланган ва бироз вақт карахтлик ҳолати кузатилган. Ҳолат бўйича ҳудуд профилактика инспекторига хабар берилган.
Шифокор Тошкент тиббиёт академиясининг юз-жаг хирургияси бўлимига олиб кетилган. Керакли тиббий ёрдам кўрсатилгач, у ўз вазифасига қайтган. Бироқ бир мунча вақт ўтгач, соғлиғида: бош оғриғи, бош айланиши, кўнгил айниши, умумий ҳолсизлик кузата бошлаган. Шифокор зудлик билан нейрохирургия бўлимидаги тиббий клиникага «Ёпиқ бош мия жароҳати» мия чайқалиши ташхиси билан ётқизилган.
