Бали яқинида паром чўкиши оқибатида 4 киши ҳалок бўлди

2 июль куни Индонезиянинг Бали ороли яқинида KMP Tunu Pratama Jaya номли паром чўкиб кетди. Бу ҳақда CNN Indonesia хабар берди.

Паромда 65 киши – 53 нафар йўловчи ва 12 нафар экипаж аъзоси бўлган. Шунингдек, у 22 та транспорт воситасини, жумладан, 14 та юк машинасини ташиётган.

Кетапанг—Банюванги—Гилиманук йўналишида ҳаракатланаётган паром сузиб чиққанидан 25 дақиқа ўтиб чўкиб кетган. Ҳозирга қадар 23 киши тирик ҳолда қутқарилган, 4 кишининг эса ҳалок бўлгани тасдиқланди.

Бедарак йўқолганларни излаш ишлари давом этмоқда.

Тергов бошланиб, ҳодиса сабаблари аниқланмоқда.

Қутқарув ишларига денгиз флоти, полиция ва маҳаллий кўнгиллилар жалб қилинган.

Қайд қилинишича, Индонезияда паром қатнови кенг тарқалган бўлса-да, хавфсизлик чораларининг етарли эмаслиги бундай ҳодисаларнинг қайта-қайта юз беришига сабаб бўлмоқда.