Тошкентда ўйинчоқ тўппонча билан банкка бостириб кирган шахс жазоланди
Юнусобод туманидаги банк филиалига ўйинчоқ тўппонча билан кириб, босқинчиликка уринган эркакка суд ҳукми чиқарилди. Бу ҳақда Millar дастурида хабар берилди.
Воқеа 2025 йил апрель ойида юз берган. Ниқоб таққан эркак банк ходимларига ўйинчоқ қуролни тираб, пул талаб қилган. Ходим хавф тугмасини босганидан сўнг у қочишга уринган, аммо тез орада қўлга олинган.
Суд жараёнида эркак бу ишга қарзлар ва руҳий тушкунлик сабаб қўл урганини билдирган. У тўппончанинг набирасиники эканини, ичкарига киргач қилаётган иши нотўғрилигини англаб чиқиб кетганини айтган. Пул олмаган ва ҳеч кимга тан жароҳати етказмаганини таъкидлаган.
Банк ходими жабрланувчи сифатида унга қарши даъво аризаси бермаган бўлса-да, қонуний чора кўрилишини сўраган.
Суд Жиноят кодексининг 164-моддаси 1-қисми (босқинчилик) бўйича айблов эълон қилиб, унга 5 йил муддатга озодликдан маҳрум этиш жазоси тайинлади. Жазо умумий тартибли колонияда ўталади.
