Бойсунда ўрмон ёнғини содир бўлди

Сурхондарё вилоятининг Бойсун туманидаги Кенгдала ўрмон хўжалиги бўлимига қарашли арчазорларга туташ ҳудудда содир бўлган ёнғин 13 соат ичида ўчирилган. Бу ҳақда ФВВ матбуот хизмати хабар берди.

Қайд қилинишича, 17 июнь куни соат 17:45 да арчазорларга туташ қуруқ ўтлар ёнаётгани ҳақида хабар келиб тушган. Шунга асосан ёнғин-қутқарув экипажлари зудлик билан воқеа жойига етиб борган. Ёнғин 18 июнь соат 07:10 да тўлиқ бартараф этилиб, унинг кенг майдонларга тарқалишининг олди олинган.

Ёнғинни ўчириш ишларига Сурхондарё вилоят ФВБдан 85 нафар ходим ва 4 та техника, Ўрмон хўжалиги бўлимидан 40 нафар ходим ва 4 та техника, ИИБдан 6 нафар ходим, Мудофаа вазирлигидан 20 нафар ҳарбий хизматчи ва бир дона ҳарбий вертолёт ҳамда 40 нафар маҳаллий кўнгилли жалб этилган.

Шунингдек, ёнғин ҳолатини кузатиш ва назорат қилишда чегара қўшинларининг учувчисиз учиш аппаратларидан ҳам фойдаланилган.