Буэнос-Айресдаги намойишларда 50 дан ортиқ киши жабрланди
Буэнос-Айресдаги Аргентина Конгресси олдида норозилик намойишлари полиция билан тўқнашувларга айланди. «La Nacion» газетаси хабарига кўра, камида 56 киши жабрланган.
Маълумотларга кўра, 11 киши шифохонага ётқизилган, бир фотограф бошидан ўқотар яраси олган. Шунингдек, олти полиция ходими ҳам жароҳатланган.
Ҳуқуқ-тартибот органлари 150 дан ортиқ тартиббузарни қўлга олган.
Норозилик намойишига бир неча минг киши қатнашган бўлиб, у чоршанба куни бошланган. Расман бошланишидан аввал полиция ва футбол мухлислари ўртасида тўқнашув рўй берган. Улар нафақахўрлар билан бирга яшаш шароитларини яхшилашни талаб қилган.
Полиция намойишчиларни тарқатиш учун кўздан ёш оқизувчи газ ва сув пуркагичлардан фойдаланган. Тартибсизликлар чоғида намойишчилар полицияга тош ва шиша идишлар отган, бир нечта чиқинди контейнерлари ва полиция автомобили ёқиб юборилган.
