Навоийда муқаддам 5 марта судланган эркак қўшнисини пичоқлади

Навоийда муқаддам беш маротаба судланган 52 ёшли эркак қўшнисини пичоқлади.

Маълум қилинишича, 2022 йил апрель ойида жазодан озод этилиб, пробация ҳисобида юрган эркак 19 май куни соат тахминан 20:30 да қўшниси билан спиртли ичимлик ичиб ўтирган вақтида оғзаки тортишувдан сўнг жанжаллашиб кетган.

Шундан сўнг қўшнилар жанжални яшаш хонадонидан чиқиб, кўчада давом эттирган. Шу пайт уларни ажратиш учун бошқа бир қўшни келганида эркак қўлида турган ошхона пичоғи билан унинг қорнига зарба берган. Маълумотларга кўра, жабрланувчининг аҳволи ўртача оғирликда.

Ҳозирда эркакка нисбатан Жиноят кодексининг тегишли бандлари билан жиноят иши қўзғатилиб, дастлабки тергов ҳаракатлари олиб борилмоқда.