Чикагода дам олиш маскани олдида содир бўлган отишмада 4 киши ҳалок бўлди
АҚШнинг Чикаго шаҳрида, шаҳарнинг Ривер Норз туманида жойлашган Artis Lounge дам олиш маскани яқинида 3 июль куни кечқурун содир бўлган отишмада тўрт киши ҳалок бўлди.
Маълум қилинишича, воқеа соат 23:00 (Тошкент вақти билан 4 июль соат 06:00) атрофида содир бўлган. Полиция берган маълумотга кўра, номаълум шахслар Чикаго авенюсида ҳаракатланаётган автомобилдан Artis Lounge олдида турган одамлар томонга ўқ узган. Оқибатда 13 нафар аёл ва 5 нафар эркак — жами 18 киши ўққа тутилган, улардан тўрт нафари воқеа жойида ҳалок бўлган, уч киши оғир аҳволда касалхонага ётқизилган.
Чикаго полицияси бошлиғи Ларри Снеллинг отишма режалаштирилган бўлиши мумкинлигини айтиб, бу «тасодифий ҳолат эмас»лигини таъкидлади. Воқеа жойидан икки хил турдаги ўқ-дорилар гильзаси топилган. Ҳозирча жиноятчилар аниқланмаган, улар воқеа жойидан дарҳол қочиб кетган. Полиция жамоатчиликдан воқеага оид ҳар қандай маълумотларни аноним тарзда етказишни сўрамоқда.
Воқеа содир бўлган вақтда Artis Lounge ичида маҳаллий хонанда Мелло Буcкзз янги альбоми тақдимотини ўтказаётган бўлган. Ҳодисадан сўнг маскан вақтинчалик ёпилди.
Тергов ишлари давом этмоқда. Расмийлар ушбу ҳолат юзасидан барча тафсилотларни ўрганмоқда.
