Шавкат Мирзиёев Туркия президентига ЙТХ оқибатида ҳалок бўлганлар муносабати билан ҳамдардлик билдирди
Йўловчи автобуси тўсиққа бориб урилган ва ёниб кетган, оқибатда саккиз киши ҳалок бўлган
Ўзбекистон етакчиси Шавкат Мирзиёев Туркия Республикасининг Денизли вилоятида йўловчи автобуси ҳалокатга учрагани оқибатида инсонлар қурбон бўлгани ва жароҳат олгани муносабати билан президент Режеп Таййип Эрдоғанга таъзия йўллади.
Давлат раҳбари ҳалок бўлганларнинг оила аъзоларига чуқур ҳамдардлик изҳор этиб, жароҳатланганлар тез фурсатларда шифо топишини тилади.
Маълумот учун, Денизли — Айдин трассасининг Тирказ ҳудуди яқинида йўловчи автобуси тўсиққа бориб урилган ва ёниб кетган.
Ҳодиса оқибатида саккиз киши, жумладан, ҳайдовчи ва тўққиз ойлик чақалоқ ҳалок бўлган, яна 33 киши турли даражадаги тан жароҳатлари олган. Жароҳатланганлар тез ёрдам машиналарида шифохоналарга етказилган, ҳалок бўлганларнинг жасадлари эса суд-тиббий экспертизасига юборилган.
