Ўзбекистонда айрим компанияларнинг эксклюзив ҳуқуқлари бекор қилинмоқда
Президент Шавкат Мирзиёев рақобатни ривожлантириш ва хусусий секторнинг иқтисодиётдаги ролини оширишга қаратилган фармонни имзолади.
2025 йил 1 апрелдан бошлаб, компанияларга эксклюзив ҳуқуқлар фақат қонунлар, президент фармонлари ва қарорларига асосан берилади. Бу ҳуқуқлар уч йилдан ошмаслиги керак. Фақатгина қуйидаги ҳолатларда истиснолар мумкин:
— Конституциявий тузум, аҳоли саломатлиги, мудофаа, давлат хавфсизлиги ва жамоат тартибини ҳимоя қилиш;
— Табиий офатлар, фалокатлар ва эпидемияларнинг олдини олиш ва оқибатларини бартараф этиш.
2024 йил 1 апрелдан қуйидаги эксклюзив ҳуқуқлар бекор қилинади:
— «Ўзбекэкспертиза» – чет эл инвестициясига эга корхоналар томонидан олиб келинадиган мол-мулкни сертификатлаштириш;
— «ЎзИнжиниринг» – инвестиция лойиҳалари учун лойиҳаолди ва лойиҳа ҳужжатларини ишлаб чиқиш;
— «Миллий PR-марказ» – Ўзбекистонда туризмни тарғиб қилувчи чет эл компаниялари ва ОАВ рекламалари ва репортажларини тайёрлаш ва эфирга узатиш;
— «Sag agro МТП» – ёнғоқ ишлаб чиқарувчиларга агротехника хизматлари кўрсатиш;
— «Ўзбек стандарти институти» – миллий стандартларни бошқа тилларга таржима қилиш.
Туризм қўмитаси эндиликда туроператорлар, меҳмонхоналар, тоғ чанғи йўлаклари ва пляжларни текшириб, уларга категория бериш ҳамда тасдиқланган хизматларни стандартлаштириш билан шуғулланади. Илгари бу вазифани «Туристик хизматлар сертификатлаштириш маркази» бажарар эди.
Эксклюзив ҳуқуқларга эга компанияларга истеъмолчиларнинг товарларни керакли ҳажм ва сифатда харид қилиш ҳуқуқини чеклаш, сотиш ёки харид қилишда дискриминацион шартлар қўйиш, шартнома тузишдан асоссиз бош тортиш, давлат томонидан тартибга солинадиган товарлар учун белгиланган нархдан ортиқ маблағ талаб қилиш ёки хизмат кўрсатмасдан пул олиш тақиқланади.
