Россия ИИВ раҳбари «фойдасиз» мигрантларни чиқариб юборишни таклиф қилди
Россия ички ишлар вазири ишламаётган, ўқишга кирмаган, бармоқ изини топширмаган ва рус тилини ўрганмаётган мигрантларни мамлакатдан чиқариб юборишни таклиф қилди. Бу ҳақда «РБК» нашри хабар берди.
Кўчаларда ва турар жой секторларида ноқонуний мигрантлар бўлмаслиги керак. Ишсиз қолганлар, ўқишдан четлатилганлар, дактилоскопиядан ўтмаганлар, тил ўрганмаётганлар ва жамиятга фойда келтирмаётганлар Россияни тарк этиши зарур, — деди Колокольцев.
У, шунингдек, мигрантлар ўртасида жиноятчиликка қарши курашиш бўйича тизимли чораларни кучайтириш лозимлигини таъкидлади. ИИВ раҳбари жиноят содир этганлар муқаррар жазога тортилиши кераклигини айтиб, бу борадаги чораларни кенг жамоатчиликка етказишни тавсия қилди.
Вазир, шунингдек, миграция бўлимларидаги навбатларга чек қўйиш кераклигини айтиб, ҳужжатларни қабул қилиш ва расмийлаштириш жараёнлари муаммосиз, вақтида амалга оширилиши лозимлигини билдирди.
Аввалроқ, Москвадаги рейд пайтида вақтинча ишлаётган хорижлик мигрантларга нисбатан куч ишлатилгани муҳокамаларга сабаб бўлган эди. Ўзбекистон томони бу воқеа юзасидан Россия Ташқи ишлар вазирлигига норозилик нотаси юбориб, куч ишлатган ходимларнинг ҳаракатларига ҳуқуқий баҳо берилишини сўраган.
