Кенияда ҳукуматга қарши намойишларда 16 нафарга яқин киши ҳалок бўлди

Кенияда президент Уилям Руто ҳукуматига қарши ўтказилган кенг кўламли норозилик намойишларида 16 киши ҳалок бўлди, 400 дан ортиқ киши жароҳат олди. Бу ҳақда BBC хабар берди.

Найроби ва бошқа шаҳарларда намойишчилар билан полиция ўртасида тўқнашувлар юзага келган. Кўпчилик намойишчилар «Руто кетиши керак» деган талаб билан чиқиш қилган ва тинч қаршилик рамзи сифатида дарахт шохларини силкитган.

Ҳукумат намойишларни телевидение ва радио орқали ёритишни тақиқлаган, аммо бу қарор Найробидаги Олий суд томонидан бекор қилинган.

Полиция норозиликлар чоғида президент қароргоҳи ва парламентга олиб борадиган йўлларни баррикадалар ва устара симлар билан ёпди. Намойишчилар президент қароргоҳига бостириб киришга уринган ва бу ҳаракат полиция томонидан тўхтатилган. Шундан сўнг, президент қароргоҳига ташрифлар камайтирилган.

Расмийлар норозиликдаги қурбонлар сони бўйича аниқ рақамларни бермаган. Амнестй Кеня инсон ҳуқуқлари ташкилоти эса ҳалок бўлганлар сони 16 нафарни ташкил этганини билдирган.

Кения тиббиёт ассоциацияси, Кения ҳуқуқ жамияти ва полиция ислоҳотлари бўйича ишчи гуруҳ эса камида 8 нафар намойишчи ҳалок бўлганини маълум қилган. 400 дан ортиқ яраланганлардан 83 нафари махсус даволанишга муҳтож экани, 8 нафари ўқотар қуролдан яралангани айтилмоқда. Жабрланганлар орасида 3 нафар полициячи ҳам бор.

Намойишчилар орасида бўлган Амина Муде BBC’га берган интервьюсида намойишга қўшилиш сабабини таълим тизимидаги муаммолар ва раҳбариятнинг халқни тингламаётганлиги билан изоҳлаган.