Германиядаги сайловларда Фридрих Мерц бошчилигидаги блок ғалаба қозонди

Германия Федерал сайлов комиссияси сайтида 24 феврал куни эълон қилинган маълумотларга кўра, Фридрих Мерц бошчилигидаги консерватив ХДИ/ХСИ блоки 28,6% овоз билан Бундестагга бўлиб ўтган навбатдан ташқари сайловларда ғалаба қозонди.

Ўта ўнг «Германия учун муқобил» (ГуМ) 20,8% овоз билан иккинчи, сўл марказчи Германия социал-демократик партияси (ГСДП) эса 16,4% овоз билан учинчи ўринни эгаллади. Тўртинчи ўринни «Иттифоқ-90/яшиллар»нинг сўл либераллари (11,6% овоз), бешинчи ўринни Сўл партия (8,8%) қўлга киритди.

Либерал эркин демократик партия (ЭрДП) ва сўл популист Сара Вагенкнехт Иттифоқи (СВИ) Бундестагга кира олмади. Сайлов комиссияси маълумотларига кўра, биринчиси бор-йўғи 4,3%, иккинчиси эса 4,972 фоиз овоз тўплаган, парламентга кириш чегараси 5% ни ташкил қилган.

ХДИ/ХСИ ва ГСДП мандатлари «катта коалиция»ни шакллантириш учун етарли бўлиши керак

Шундай қилиб, ХДИ/ХСИ ва ГСДП оладиган мандатлар ҳукмрон «катта коалиция»ни шакллантириш учун етарли бўлиши керак.

Шу билан бирга, Германиянинг амалдаги канцлери Олаф Шолц 23 феврал куни Фридрих Мерц ва ХДИ/ХСИ блоки билан коалиция тузиш бўйича музокараларни шахсан ўтказмаслигини ва янги ҳукумат таркибига қўшилмаслигини маълум қилди. 

Мен канцлерликка номзодимни қўйгандим, — дея хулоса қилди у. 

Фридрих Мерц 2025 йил 21 апрел, Пасхагача янги немис ҳукуматини тузишга ваъда берди. Сиёсатчи унга кимлар қўшилиши мумкинлиги ҳақида гапиришдан бош тортди, лекин унинг партияси ГуМ билан бирга мамлакатни бошқармаслигини таъкидлади.