Грузия мухолифати тўхтовсиз норозилик намойишини эълон қилди

Грузия мухолифати ва ҳукмрон «Грузия орзуси» партияси мухолифлари янги сайловлар ўтказиш талаби билан Тбилисининг асосий магистралларидан бирини тўсиб қўйди. Бу ҳақида «Америка овози» хабар бермоқда.

17 ноябрь куни кечқурун Тбилиси давлат университети биноси ёнидаги йўлда намойишчилар ўттизга яқин чодир қуриб, уларда тунаб қолишди. Иштирокчилар қайта сайланишга эришгунларича норозилик чодирларини аввал пойтахтда, кейин эса бутун мамлакат бўйлаб турли жойларга кўчиришни режалаштирган.

Расмий маълумотларга кўра, 26 октябрь куни бўлиб ўтган сайловларда ҳукмрон «Грузия орзуси» партияси 53,93 фоиз овоз олиб, парламентдаги 150 ўриндан 89 тасини қўлга киритган эди. Шу билан бирга, «Грузия орзуси» барча йирик шаҳарларда, жумладан, Тбилисида, шунингдек, хориждаги сайлов участкаларида мухолифат устидан ғалаба қозонган.

Парламентга кирган тўрт мухолифат гуруҳи сайловлар сохталаштирилганини даъво қилиб, овоз бериш натижаларини тан олмаган. Улар Грузия судлари ва прокурорлари мустақил эмаслигини ва ҳокимиятга бўйсунишини таъкидлаб, халқаро тергов ўтказилишини талаб қилмоқда. Грузия президенти Саломе Зурабишвили ҳам «Грузия орзуси» сайловларни сохталаштирганини айтиб, янги сайловлар ўтказишга чақирган.

Нодавлат нотижорат ташкилотлари ва кузатувчи ташкилотлар бу сайловларни тан олмайди. Улар мамлакат ичида ҳам, ташқарисида ҳам сайловлар эркин ва адолатли ўтганини даъво қилишдан ўзини тияди. Орадан уч ҳафта ўтди, бизнинг асосий демократик ҳамкорларимиздан бирортаси бу сайловларни тан олмади, деди Грузия етакчиси.

Президент 18 ноябрь куни мамлакат аҳолисига қилган махсус мурожаатномасида 26 октябрдаги сайловда яширин ва умумий овоз бериш тамойиллари бузилганини таъкидлаган. У парламент сайловлари натижалари юзасидан Конституциявий судга шикоят қилишини билдирган.

Зурабишвилининг таъкидлашича, ўтган сайловлар мамлакат аҳолисининг аксарияти томонидан тан олинмаган ва бу «ўзининг адолатли норозилиги» давом этмоқда.