Исроил ҳужумлари оқибатида Ғазода 73 киши ҳалок бўлди
HAMAS АҚШ томонидан илгари сурилган Ғазо бўйича янги ўт очишни тўхтатиш таклифига урушни тугатишга олиб келадиган аниқ кафолатлар бўлишини талаб қилмоқда. Бу ҳақда ҳаракатга яқин манбага таяниб Al Jazeera хабар берди.
Ушбу баёнотлар Исроил Ғазо бўйлаб ўз ҳарбий амалиётларини кучайтираётган бир вақтда эълон қилинди. Ғазо фуқаролик мудофааси агентлигининг маълумотига кўра, пайшанба куни Исроил ҳужумлари натижасида 73 киши ҳалок бўлган.
Исроил бош вазири Бинямин Нетаняху ҳали ҳам HAMAS қўлида гаровда сақланаётган барча фуқароларни уйларига қайтаришини маълум қилган.
Расмий Ғазо соғлиқни сақлаш вазирлиги маълумотларига кўра, 2023 йил 7 октябрдан бери давом этаётган ҳарбий ҳаракатлар оқибатида Ғазода камида 57 130 киши ҳалок бўлган, 134 592 киши яраланган. Шу билан бирга, 7 октябрь ҳужумлари чоғида Исроилда 1 139 киши ҳалок бўлгани, 200 дан ортиқ одам гаровга олингани айтилган.
Европа Иттифоқининг собиқ ташқи сиёсат раҳбари Хосеп Боррелл эса АҚШ билан боғлиқ қуролли гуруҳларни Ғазода юзлаб очликдан азият чекаётган фаластинликларни ўлдиришда айблаб, Европа Иттифоқи томонидан етарли чора кўрилмаётганини танқид қилган.
АҚШ Президенти Доналд Трамп эса келаси ҳафта Исроил бош вазири Нетаняху билан учрашуви олдидан Ғазо аҳолисининг хавфсизлигини таъминлаш истагини билдирган ва сулҳ бўйича музокаралар олиб боришни режалаштирмоқда.
