Ўзбекистонда 2 нафар адвокат йирик миқдордаги пора билан қўлга тушди
Иккала ҳолат бўйича гумонланувчиларга нисбатан жиноят иши қўзғатилган
Самарқанд ва Жиззах вилоятларида фаолият юритувчи адвокатнинг ноқонуний ҳаракатига чек қўйилди. Бу ҳақда Давлат хавфсизлик хизмати хабар беради.
Биринчи ҳолатда, адвокат мансабдор танишлари орқали Жиззах вилоятидаги манзил колонияда озодликдан маҳрум қилиш жазосини ўтаётган маҳкумнинг жазо муддатини қисқартириб бериш эвазига унинг танишидан 15 минг АҚШ доллари олган вақтида ашёвий далиллар билан ушланади.
Шу билан бирга, Самарқанд вилоятининг Қўшработ туманида фаолият юритувчи адвокат эса жиноят ишлари бўйича мазкур туман судида кўрилаётган жиноят иши бўйича ҳимоячи сифатида қатнашиб, мансабдор танишлари орқали судланувчига енгилроқ жазо тайинланишида ёрдам беришини айтиб, унинг ўғлидан 2 минг АҚШ доллари талаб қилган.
Натижада, ўтказилган тезкор тадбирда адвокат сўралган пул маблағини олган вақтида ушланади.
Ҳозирда адвокатларга нисбатан жиноят ишлари қўзғатилиб, тергов ҳаракатлари олиб борилмоқда.
