Ўзбекистонда тўй харажатларига муносабат бўйича тадқиқот натижалари эълон қилинди
Ўзбекистонликларнинг 25% и тўй харажатлари учун қарз олган. Бу ҳақда «Юксалиш» ҳаракати тадқиқотида маълум қилинди.
«Юксалиш» умумхалқ ҳаракати 2025 йил 19 июндан 3 июлгача «Ўзбекистонда тўйлар» мавзусида ўтказган ижтимоий сўровнома натижаларини эълон қилди. Унда иштирок этган 1 247 респондентнинг 25% дан ортиғи тўй харажатлари учун қарз олишга мажбур бўлганини билдирган.
Сўровда қатнашганларнинг 81% и ўз ойлик даромадини 5–12 млн сўм оралиғида деб кўрсатган. Тўй учун сарфланган ёки сарфланиши режалаштирилган маблағ эса 65% респондентда 50 млндан 100 млн сўмгача ёки ундан юқори миқдорни ташкил этган.
Респондентларнинг ярмидан кўпи харажатларни яқинлар ёрдами билан қоплаганини билдирган бўлса, чорак қисми бевосита қарз олганини тан олган.
Тўй харажатларининг асосий сабаблари сифатида жамият босими (46,1%), ёшлар ва ота-онанинг орзулари (30–31%) ва қуда томоннинг талаби (16,6%) каби омиллар қайд этилган.
Сўров натижаларига кўра, фуқаролар камтарона ва ўртача тўйларни афзал кўради. Дабдабабозликни эса атиги 6,6% респондент танлаган. 44,5% киши ҳаддан ташқари кўп харажат қилишдан афсусда эканини билдирган.
Аксарият респондентлар тўйга сарфланадиган маблағни таълим, уй-жой, соғлиқ ёки бизнесга йўналтиришни маъқул деб топган.
Тадқиқот хулосасига кўра, фуқароларнинг тўй маросимларини соддалаштиришга тайёрлиги ва бу борада жамиятда кучли ижтимоий буюртма шакллангани таъкидланган.