Қашқадарёда аёл қариндошлари билан бирга эрининг маъшуқасини «самосуд» қилди
Ижтимоий тармоқларда, Қашқадарё вилоятида бир аёл яқинлари билан эрининг маъшуқасини калтаклагани ҳақида видео тарқалди. Вазиятга вилоят ИИБ томонидан изоҳ берилди.
Жорий йилнинг 24 июль куни соат 22:30 ларда Чироқчи туманида, яшовчи аёл 102 рақамига мурожаат қилиб, у билан бирга расмий никоҳсиз яшаб келаётган эркакнинг онаси хонадонига келиб жанжал кўтараётганлигини маълум қилган.
Шундан сўнг, ходиса жойига профилактика инспектори етиб бориб, жанжални бартараф этиш мақсадида эркакни тумани ИИБ биносига олиб келган.
Аниқланишича, эркакнинг расмий никоҳида бўлган аёли қариндошлари билан бирга жамоат жойида «Сенга эрим керакми» деб, аёлни бир неча маротаба танасининг турли жойларига тепиб, уриб кийимсиз ҳолатда қолдирган.
Маълум қилинишича, профилактика инспектори томонидан тўлиқ терговга қадар текширув ҳаракатлари олиб борилган ва процесс иштирокчиларининг олган тан жароҳати оғирлик даражасини аниқлаш мақсадида судга оид тиббий экспертиза тайинланган.
Ҳолат юзасидан Жиноят кодексининг 277-моддаси 1-қисми билан жиноят иши қўзғатилиб, тергов ҳаракатлари олиб борилмоқда.
