Европадаги ўрмон ёнғинлари 230 минг гектардан ортиқ ҳудудни қамраб олди
Жазирама ва қурғоқчилик туфайли Европада деярли Люксембург ҳудудига тенг майдон — 231 539 гектар ер ёниб кетди. Бу ҳақда Euronews хабар берди.
Бу ўртача кўрсаткичдан 119% га кўп. 15 июль ҳолатига кўра, ҳафта давомида содир бўлган ўрмон ёнғинлари сони ҳам сезиларли даражада ошган — ҳафтасига ўртача 1230 та ёнғин қайд этилган. Бу кўрсаткич одатдаги ўртача 478 та ҳодисадан анча юқори. Мутахассисларнинг фикрича, ёнғинларнинг кўпайишига февраль ва март ойларидаги қуруқ ва иссиқ ҳаво сабаб бўлган.
Сўнгги ҳафталарда айниқса Туркия, Крит (Греция), Франция, Буюк Британия, Португалия, Испания ва Руминияда кучли ёнғинлар юз берган. Туркияда юзлаб одамлар эвакуация қилинган, камида уч киши ҳалок бўлган. Кирит оролида оммавий эвакуация эълон қилинган, Франциянинг Марсел шаҳрида эса ёнғинлар тартибсизликларга сабаб бўлган.
Мутахассисларнинг таъкидлашича, иқлим ўзгариши атмосферага карбонат ангидрид чиқиндиларининг кўпайишига, бу эса ҳавонинг исиб боришига ва ёғингарчиликнинг камайишига олиб келмоқда. Бу ҳолат ўрмонларнинг қуриб, ёнғинга чидамсиз бўлиб қолишига сабаб бўлмоқда.
Европа Иттифоқи маълумотларига кўра, 2025 йил 16 июль ҳолатига қадар ўрмон ёнғинлари натижасида минтақада атмосферага чиқарилган карбонат чиқиндилар ҳажми 1,9 мегатоннани ташкил қилган.
