Норвегия пенсия жамғармаси Исроил армиясига кўмаклашган 2 та компания билан ҳамкорликни тўхтатди
Норвегия пенсия жамғармаси Исроил армиясига ускуналар етказган икки компания билан сармоявий алоқани узди. Бу ҳақда Al Jazeera хабар берди.
Норвегиянинг энг йирик пенсия жамғармаси бўлган KLP Исроил армиясига ускуналар етказиб бераётган АҚШнинг Oshkosh корпорацияси ва Германиянинг ThyssenKrupp компаниялари билан инвестицион ҳамкорликни тўхтатганини маълум қилди.
Жамғарма вакилларининг сўзларига кўра, 2024 йил июнь ойида БМТ орқали бу компаниялар томонидан сотилаётган ҳарбий юк машиналари ва бошқа техникалар Ғазодаги урушда қўлланилаётгани аниқланган.
Ушбу компаниялар бизнинг инвестиция кўрсатмаларимизга зид фаолият юритмоқда, дейилади KLP баёнотида.
KLP Oshkosh компаниясига $1,8 млн, ThyssenKrupp’га эса $1 млнга яқин маблағ сармоя қилган эди. У $114 млрд долларлик активларга эга ва 900 мингдан ортиқ муниципал ишчиларни қамраб олган давлат пенсия жамғармаси ҳисобланади.
Компаниялар KLP огоҳлантиришига жавобан ўз фаолиятини тан олган. Oshkosh Ғазода Исроил армияси учун транспорт воситалари ва эҳтиёт қисмлар етказиб беришини тасдиқлаган.
ThyssenKrupp эса Исроил билан узоқ муддатли ҳарбий ҳамкорлиги мавжудлигини билдирган. У 2020–2021 йилларда Саъар 6 типидаги 4 та ҳарбий кема етказиб берган ва 2025 йил охирига қадар сув ости кемаси топширишни режалаштираётгани қайд этилган.
