Крит оролидаги ёнғин оқибатида мингдан ортиқ киши эвакуация қилинди
Грециянинг Крит оролида юзага келган кучли ёнғин сабаб мингдан ортиқ аҳоли ва сайёҳлар эвакуация қилинди. Бу ҳақда расмийларга таяниб Reuters маълум қилди.
Ёнғин ўрмон ва зайтунзорларни қамраб олиб, бир нечта уйлар ва меҳмонхоналарга етиб борган.
Критнинг жануби-шарқий қисмидаги Леропетра шаҳри яқинида бошланиб, кучли шамоллар ёрдамида тез тарқалган ёнғинга қарши курашиш учун 230 нафар ёнғин ўчириш ходими, 46 та техника ва бир нечта вертолёт жалб этилган. Ёнғин вақтида шамол кучи баъзи жойларда Буфорт шкаласининг 9 даражасига етгани айтилмоқда.
Фавқулодда ҳолат сабабли камида тўртта аҳоли пункти бўшатилган. Эвакуация қилинганлар орасида туристлар ҳам бор. Айрим сайёҳлар Критни кемаларда тарк этган. Маҳаллий ОАВ айрим уйлар шикастланганини, бир неча одам эса нафас олишда қийналгани сабабли шифохонага ётқизилганини билдирган.
Минтақадаги меҳмонхоначилар уюшмаси раҳбари Жорж Тсаракиснинг айтишича, 5 мингга яқин сайёҳ оролдан чиқиб кетган.
Греция ёнғин хавфсизлиги хизмати вакили Вассилис Ватракогианниснинг билдиришича, июль ойи ёнғинлар учун энг хавфли давр ҳисобланади, чунки бу даврда ҳарорат юқори ва шамоллар кучли бўлади.
