Тошкентда 2 ёшли бола автомашинадан йўл устига тушиб кетди
Ижтимоий тармоқларда кичик ёшдаги боланинг автомашинадан йўл қатнов қисмига тушиб кетгани акс этган видеолавҳа тарқалди. Мазкур ҳолатга Тошкент шаҳар ИИББ ЙҲХБ матбуот хизмати изоҳ берди.
Видеога олинган ҳодиса 13 январь куни соат 17:05 атрофида Мустақиллик шоҳкўчасида содир бўлган.
Маълум қилинишича, 25 ёшли Tracker-2 русумли автомашина ҳайдовчиси М. М. ҳаракат вақтида эътиборсизликка йўл қўйган, оқибатда автомашинанинг орқа чап эшиги очилиб кетган. Натижада унинг икки ёшли фарзанди йўл қатнов қисмига тушиб кетган.
Шу билан бирга, Tracker ортидан ҳаракатланаётган BYD автомашинаси ҳайдовчиси ўз вақтида тормоз беришга улгурган. Чорраҳада хизмат олиб бораётган инспектори болани кўтариб, отасига топширган. Бола тан жароҳати олмагани билдирилди.
