Шимолий Ирландияда муҳожирларга қарши тартибсизликлар бўлиб ўтди
Шимолий Ирландиянинг Баллимена шаҳрида икки кеча давом этган тартибсизликлар ортидан 15 нафар полициячи жароҳат олди, бир нечта уй ва автомобиллар эса ёқиб юборилди. Бу ҳақда манбаларга таяниб AL Jazeera хабар берди.
Тартибсизликлар шанба куни ушбу шаҳарда бир ўсмир қизга нисбатан жинсий зўравонлик содир этилгани ҳақидаги хабарлардан сўнг бошланган. Душанба куни ўтказилган ҳушёрлик тадбири тартибсизликларга айланиб кетган. Ниқоб таққан шахслар кўчада баррикадалар қуриб, полицияга Молотов коктейллари, тош ва пўлат қувурлар билан ҳужум қилишган. Полиция эса сув пуркагичлар ва пластик ўқлар билан жавоб берган.
Маҳаллий матбуотга кўра, зўравонликда гумонланган икки ўсмир судга олиб чиқилган ва улар румин таржимон талаб қилган. Бу эса айрим фуқаролар орасида муҳожирларга нисбатан норозиликни кучайтирган.
Сешанба куни тартибсизликлар давом этиб, бир уй бутунлай ёниб кетган, яна бир уйни ёқишга уриниш бўлган. Бир нечта автомобиль ҳам ёқиб юборилган. Аҳоли орасида қўрқув кучайиб, айримлар эшикларига ўз миллатини билдирувчи белгиларни қўяётгани айтилмоқда — бу орқали улар ҳужумдан сақланмоқчи бўлмоқда.
52 ёшли руминиялик муҳожир Корнелия Албу оммавий ахборот воситаларига берган интервьюсида: “Кеча даҳшатли эди, кўплаб одамлар уйимизни ёқишга уринишди. Энди кўчишга мажбурмиз, лекин янги жой топиш қийин, чунки мен руминияликман”, — деган.
Шимолий Ирландия Полиция Хизматининг юқори лавозимли расмийси Раян Хендерсон бу воқеаларни ирқий нафрат асосидаги ҳужумлар деб атаган.
Буюк Британиянинг Шимолий Ирландия бўйича вазири Ҳилари Бин эса бундай ҳаракатларни кескин қоралаб, “ҳеч қандай ҳолатда ҳам муҳожирлар ёки полицияга қарши тажовуз оқланмайди” деган баёнот берган.
Айни вақтда полиция тартибсизликларда қатнашган шахсларни аниқлаш ва жавобгарликка тортиш бўйича тергов ишларини олиб бормоқда. Ирландия ОАВ эса бошқа шаҳарларда ҳам шунга ўхшаш норозилик намойишлари бўлиши мумкинлигидан огоҳлантирмоқда.
