Эронда норозилик намойишлари ортидан интернет ўчирилди
Эроннинг бутун ҳудудида мамлакатдаги норозилик намойишлари ортидан интернет алоқаси ўчирилди. Бу ҳақда интернетни мониторинг қилувчи халқаро NetBlocks хизмати хабар бермоқда.
Реал вақт режимидаги маълумотлар ҳозирда Эрон бутун мамлакат бўйлаб интернет ўчирилган ҳолатда эканини кўрсатмоқда, — дейилади хизматнинг X ижтимоий тармоғида.
Хизматнинг таъкидлашича, бу «мамлакат бўйлаб намойишларга қарши туришга қаратилган» бир қатор бошқа чора-тадбирлардан кейин содир бўлган.
NetBlocks аввалроқ Эроннинг Кирмоншоҳ шаҳрида норозилик намойишлари туфайли интернет хизмати ишламай қолгани ҳақида хабар берган эди. Кейинроқ эса, пойтахт Теҳрон ва мамлакатнинг бошқа қисмларида ҳам интернет ўчирилгани маълум бўлган.
Эронда норозилик намойишлари 2025 йилнинг декабр ойи охирида бошланган. Жорий йилнинг 8-январ куни, намойишчилар Теҳроннинг асосий кўчаларидан бири Оятуллоҳ Кошоний булварини тўсиб қўйишди. Шундан сўнг, хавфсизлик кучлари намойишчиларга қарши газ ишлатган.
DW маълумотига кўра, намойишлар бошланганидан бери камида 45 нафар киши, жумладан саккиз нафар вояга етмаганлар ҳалок бўлган.
