Туркияда норозилик намойишлари бошланганидан бери 1,1 мингдан ортиқ киши қамоққа олинган
Туркияда оммавий норозилик намойишлари бошланганидан буён 1,1 мингдан зиёд киши қамоққа олинган. Бу ҳақда мамлакат Ички ишлар вазири Али Ерликая маълум қилди, унинг сўзларини «Интерфакс» келтирмоқда.
19-23 март кунлари содир этилган қонунга хилоф фаолияти учун 1133 нафар гумонланувчи қўлга олинди, — деди ИИВ раҳбари.
Ерликаянинг айтишича, қамоққа олинганлар орасида 12 та турли террорчилик ташкилотига алоқадор шахслар ҳам бўлган.
Намойишларни тарқатиш чоғида камида 123 нафар полиция ходими жароҳат олган. Фуқаролар тартиб-интизомга риоя қилиш ва эҳтиёткор бўлишга чақирилди.
Туркияда норозилик намойишлари 19 март куни полиция коррупцияга қарши тергов доирасида Истанбул мери Экрем Имамоғлуни ҳибсга олганидан сўнг бошланди. Кейинчалик Имамоғли вақтинча лавозимидан четлаштирилгани ва қамоққа олингани маълум бўлди.
