Ўзбекистонда ноқонуний пойгалар учун жавобгарлик жорий этиш таклифи киритилди
Ўзбекистонда ноқонуний пойгаларни ташкил этганлик ва унда иштирок этганлик учун маъмурий ва жиноий жавобгарлик чораларини назарда тутувчи қонун лойиҳаси ишлаб чиқилди, деб хабар беради Адлия вазирлиги.
Бугунги кунда йўлларда ноқонуний ташкил этилаётган пойгалар йўл ҳаракати иштирокчиларининг хавфсизлигига, аҳолининг осойишталигига жиддий хавф солиб, инсон ўлимигача бўлган ўта салбий оқибатларга олиб келмоқда. Бу эса, аҳолининг, шу жумладан йўл ҳаракати иштирокчиларининг ҳақли эътирозлари ва хавотирларига сабаб бўлмоқда, — дейилади хабарда.
Ушбу ҳолатларни инобатга олиб, Адлия вазирлиги йўлларда ноқонуний пойгаларни ташкил этиш оқибатида вужудга келаётган йўл-транспорт ҳодисаларини олдини олиш мақсадида маъмурий ва жиноий жавобгарликни жорий этишни назарда тутувчи қонун лойиҳасини ишлаб чиқиб, манфаатдор вазирлик ва идораларга келишиш учун киритган.
Мазкур қонун лойиҳаси жорий йилнинг 17-феврал куни манфаатдор вазирлик ва идораларга келишишга чиқарилган бўлиб, белгиланган тартибда келишилганидан сўнг, жамоатчилик муҳокамасига қўйилади.
