Ғазода очликдан ҳалок бўлганлар сони 100 нафардан ошди

Ғазода сўнгги икки суткада 33 киши, шу жумладан 12 бола очликдан вафот этди. Бу ҳақда манбаларга таяниб BBC хабар берди.

Ғазо секторида вазият оғирлашаётган бир пайтда, Ҳамас назорати остидаги соғлиқни сақлаш вазирлиги ўлим ҳолатларини тоифаларга ажратиб эълон қила бошлади.

Сўнгги 48 соат ичида 33 киши, жумладан 12 бола очликдан ҳалок бўлгани маълум қилинди. Шу тариқа, очликдан вафот этганларнинг умумий сони 101 нафарга етди, улардан 80 нафари болалардир.

Бундан ташқари, вазирлик 27 майдан буён АҚШ ва Исроил кўмагида йўлга қўйилган Ғазо Гуманитар Жамғармаси (GHF) орқали ёрдам тарқатиш бошлангач, озиқ-овқат излаб ҳаракатланаётган 1 026 киши Исроил армияси томонидан ўлдирилганини билдирди. БМТ бу рақамни 1 054 нафар деб кўрсатди.

БМТ маълумотларига кўра, Ғазонинг 87,8% и Исроил эвакуация буйруқлари остида ёки ҳарбийлаштирилган ҳудуд ҳисобланади. Натижада, тахминан 2,1 млн аҳоли атиги 46 квадрат километр (18 квадрат миль) майдонга сиқилиб яшамоқда.