БААдан Ўзбекистонга халқаро қидирувда бўлган олти нафар фуқаро экстрадиция қилинди
Жорий йил бошидан буён қидирувда бўлган 16 нафар шахс БААдан Ўзбекистонга экстрадиция қилинган
Интерполнинг халқаро қидирув рўйхатида бўлган олти нафар фуқаро Бирлашган Араб Амирликларидан Ўзбекистонга экстрадиция қилинди. Бу ҳақда Ички ишлар вазирлиги хабар берди.
Жумладан, ушбу шахслар Бирлашган Араб Амирликларидан Ўзбекистон Республикасига турли оғирликдаги жиноятларни содир этганликда гумонланмоқда.
Натижада, зарур тартиб-таомиллар амалга оширилиб, халқаро қидирувда бўлган олти нафар фуқарони Ўзбекистон Республикасига экстрадиция қилиш таъминланган.
Маълум қилинишича, жорий йил бошидан буён ИИВ Интерпол ММБ ташаббуси билан қидирувда бўлган 16 нафар шахс БААдан Ўзбекистонга экстрадиция қилинган.
Мазкур натижа Интерпол йўналиши бўйича халқаро ҳамкорликнинг амалий самарадорлигини яққол намоён этиб, трансмиллий жиноятчиликка қарши курашиш, шунингдек, жиноят содир этган шахсларнинг жавобгарликдан қочиб қутулишига йўл қўймасликда икки давлат ҳуқуқни муҳофаза қилувчи органлари ўртасидаги барқарор ишчи алоқаларнинг муҳим аҳамиятга эга эканини яна бир бор тасдиқлайди, — дейилади хабарда.
