Суданда олтин кони қулаб тушиши оқибатида 50 киши ҳалок бўлди
Суданнинг шимоли-шарқидаги Нил дарёси штатида жойлашган Ҳувайд чўлида олтин кони қулаб тушди. Бу ҳақда Anadolu агентлиги хабар берди.
Қайд қилинишича, ҳодиса оқибатида камида 50 киши ҳалок бўлган, яна 7 киши тан жароҳати олиб, шифохонага ётқизилган.
Гувоҳларнинг сўзларига кўра, конь ишчилари катта миқдордаги қум ва тошлар остида қолган. Аввалроқ ҳаёт учун хавфли шароитлар туфайли ушбу конь фаолияти тўхтатилган эди.
Қутқарув ишларига техника ва профессионал гуруҳларнинг етишмаслиги тўсқинлик қилаётгани сабабли жасадларни вайроналар остидан олиб чиқиш ишлари секин бормоқда. Шу конда икки ой олдин ҳам шунга ўхшаш бахтсиз ҳодиса содир бўлган.
Африкадаги йирик олтин қазиб олувчи давлатлардан бири бўлган Суданда хавфсизлик чоралари сустлиги сабаб бундай ҳалокатлар тез-тез учраб туради. 2023 йилда 14, 2021 йилда эса 38 ишчи конь қулашлари оқибатида ҳалок бўлган. Фожиа ортидан ҳукумат устидан назорат сустлиги бўйича танқидлар кучайган.
