Россия Украинанинг 11 та ҳудудига ҳужум қилди

9 июлга ўтар кечаси Россия армияси Украинага 728 та дрон, 7 та қанотли ракета ва 6 та «Кинжал» аэробаллистик ракетаси билан зарба берди. Бу ҳақда Украина ҚК Ҳарбий-ҳаво кучлари қўмондонлиги хабар берди.

Қайд қилинишича, бу уруш бошланганидан буён қайд этилган энг кенг кўламли ҳаво ҳужуми ҳисобланади.

Украина ҳарбийлари 711 та дрон ва барча қанотли ракеталарни уриб туширганини билдирган. Ҳужумлар асосан Лутск шаҳри, Бровар тумани ва яна бир нечта ҳудудни нишонга олган. Лутскда гаражлар ва саноат объектларида ёнғин чиққан, бироқ қурбонлар ҳақида маълумот берилмаган. Бровар туманида эса бир киши жароҳатланган.

Украина президенти Владимир Зеленскийнинг таъкидлашича, ҳужум 11 та ҳудудни, жумладан, Харков, Суми, Чернигов, Днепропетровск, Николаев, Кировоград ва Черкас вилоятларини қамраб олди. У Россиянинг бу ҳаракатини «тинчликка бўлган уринишларга нисбатан намойишкорона жавоб» деб атади ва Россия нефтига нисбатан янги санкциялар зарурлигини айтди.

Шу билан бирга, Россия Ташқи ишлар вазирлиги Украина 8 июль куни Курск вилоятидаги пляж ва бошқа фуқаролик объектларига дрон орқали ҳужум уюштирганини, натижада 3 киши ҳалок бўлганини ва 7 киши, жумладан, 5 ёшли бола жароҳатланганини маълум қилди. Мамлакат ҳуқуқ-тартибот органлари томонидан мазкур ҳолат юзасидан жиноий иш қўзғатилган.