Перу собиқ президенти ва унинг турмуш ўртоғи 15 йилга қамалди
Перу суди собиқ президент Олянта Умал ва унинг рафиқаси Надин Эредияни 15 йиллик қамоқ жазосига ҳукм қилди. Бу ҳақда BBC хабар бермоқда.
Улар Бразилиянинг Одебречт қурилиш компанияси ва Венесуэла ҳукуматидан иккита сайловолди кампаниясини молиялаштириш учун тўловлар олишда айбдор деб топилди.
Ҳукм чиқарилгандан сўнг, Умала суд залида ҳибсга олинган. Унинг суд мажлисида иштирок этмаган турмуш ўртоғини ҳам судья ҳибсга олишни буюрган, бироқ у кейинчалик маълум бўлишича, Бразилиянинг Лимадаги элчихонасидан бошпана сўраган.
2011 йилдан 2016 йилгача президент бўлган Умала 2022 йилда Одебречт атрофидаги кенг кўламли коррупция можароси бўйича тергов доирасида судга тортилган Перунинг биринчи собиқ раҳбари бўлди. Расмийларга кўра, бу ишда бошқа собиқ президентлар ҳам иштирок этган.
Ҳукм эълон қилингандан сўнг, Эредия Бразилиянинг Лимадаги элчихонасига дипломатик бошпана сўраб мурожаат қилган. Унга ва кенжа ўғлига мақом берилди. Перу оиланинг хавфсиз чиқиб кетишини таъминлашга ваъда берди.
Адвокатларнинг таъкидлашича, Эредия саратон касаллигига чалинган ва аввалроқ унга Бразилияга даволаниш учун боришга рухсат берилмаган.
Таъкидланишича, ушбу иш деярли бутун Лотин Америкасини қамраб олган Лава Жато коррупцияга қарши кенг кўламли терговининг навбатдагиси бўлди.
